Арча районы укытучылары яңа ноутбуклар алды

Бүген район мәгариф идарәсендә Арча районы укытучыларына тантаналы шартларда ноутбуклар тапшырдылар. Ак Барс Банк районга 373 ноутбук тапшырды. 

Республикада цифрлаштыру елы квсаларында Президент Рөстәм Миңнеханов башлангычы белән Татарстан мәктәпләрендә ноутбукларны яңарту программасы гамәлгә ашырыла.

Барысы Татарстан укытучыларына 12 мең ноутбук тапшырылачак. Бу эш иске техниканы яңартырга, укытучыларга кәгазь эшен киметергә ярдәм итәчәк.

Район мәгариф идарәсе җитәкчесе Рамил Мөхәммәдияров үз чыгышында Ак Барс Банк һәм республика җитәкчелегенә рәхмәт белдерде.

“Әлеге проектны тормышка ашырган өчен барлык укытучылар, укучылар, әти-әниләр исеменнән Президентка, Мәгариф һәм фән министрына, Ак Барс Банкка рәхмәтебезне җиткерәбез", – диде Арчаның 5нче гимназиясе директоры Нияз Муллахмәтов.